Documents d’identitad, uffeci da lavur e lubientschas

La damonda per in document d’identitad ei da far persunalmein al spurtegl dall’administraziun communala.

Documents necessaris:

• ina fotografia da pass actuala (la fotografia san ins era tarmetter via admin@disentis.ch ni ch’ins sa far ella directamein tier l’administraziun communala)
• la veglia carta d’identitad (sche quella ei avon maun)
• sche la carta d’identitad actuala ei ida a piarder, ei quei d’annunziar al post da polizia regiunal

Ils documents vegnan emess circa 10 dis da lavur suenter la damonda.

Per schar far in pass svizzer eis ei necessari dad ir a Cuera el center da documents d’identitad. Ins sto fixar in termin via la pagina-web www.schweizerpass.ch ni per telefon.

Combi – pass svizzer e carta d’identitad

Ei dat la pusseivladad d’empustar il pass e la carta d’identitad il medem mument e per in prezi reduciu. L’offerta cumbinada dat ei exclusivamein el center da documents d’identitad cantunal.

Naven digl 1. da schaner 2023 emetta igl Uffeci per il traffic sin via las numeras d’immatriculaziun per mopeds ed e-bikes. Ulteriuras informaziuns sin www.stva.gr.ch ni per telefon: 081 257 80 00.

Tenor art. 16 dalla Lescha davart igl encurir cristallas e mineralias ed il lavar aur dalla vischnaunca da Mustér valan naven digl 1. da schaner 2019 las suandontas taxas da lubientscha.

Lubientschas supplementaras

Lubientschas supplementaras survegnan mo persunas cun domicil ella vischnaunca da Mustér.

*Annotaziun lubientscha per siglientar

(art. 3 al. 2)
Per siglientar drova ei ina lubientscha supplementara. Quella obtegnan mo persunas sesentas en vischnaunca (scret d’origin) che han cumpleniu il 20avel onn da vegliadetgna e che possedan in attest da siglientar tenor dretg federal. Per siglientar incassein nus ina taxa supplementara.

El rom dil dretg reciproc actual ei la lubientscha valeivla era ellas vischnauncas da Sumvitg e da Trun.

Las lubientschas per cavar cristallas san ins empustar directamein dall’administraziun communala ni via il formular online.

Ei drova negina lubientscha per lavar aur el territori lubiu denter igl 1. da matg ed ils 15 da settember. Gruppas ni fatschentas che offereschan purschidas da cavar aur sin basa commerciala ston inoltrar ina damonda en scret. Ins paga per la lubientscha.

Cheu anflan ins la lescha.

Persunas che cumpran da niev in tgaun ston dumandar la vischnaunca per in’identitad persunala d’Amicus. Per survegnir quella ston ellas emplenir il formular online. Cheu anfleis Vus il formular online.

Per saver annunziar il tgaun tier la vischnaunca drova ei ina copia dil pass da vaccinaziun cun la numera dil microchip. Il quen per la taglia da tgauns survegnis Vus silsuenter automaticamein. Il veterinari ni igl allevatur da tgauns sa registrar il tgaun niev sut www.amicus.ch. Per saver far quei drova el l’identitad persunala.

Tut las informaziuns relevontas sco cumpras, venditas, mortoris ed exports sto il veterinari ni igl allevatur da tgauns registrar sut www.amicus.ch. Silsuenter eis ei d’annunziar ellas alla vischnaunca.

La taglia da tgauns annuala munta a CHF 120.– per igl emprem tgaun ed a CHF 180.– per mintga ulteriur tgaun ella medema casada. Il quen survegnan ils possessurs da tgauns mintgamai l’entschatta digl onn. Tgauns da polizia, tgauns da lavinas e tgauns per persunas tschoccas e suordas ein deliberai dalla taxa.

Sacs da rumien saveis Vus retrer al spurtegl dall’administraziun communala. Ulteriuras informaziuns dat ei cheu.

Igl ei lubiu da carrar sin las vias d’uaul e da cultivaziun naven digl 1. d’avrel entochen ils 15 da december.

In extract dil register penal san ins empustar al spurtegl dalla posta ni online.

Lubientscha da menar in’ustria

Persunas che meinan ustrias, bars, hotels, bistros, caffés, ustrias occasiunalas ed autras ustrias che surveschan vinars drovan ina lubientscha da menar in’ustria. Ellas ston tarmetter la damonda en scret all’administraziun communala e drovan ultra da quei aunc in extract dil register penal.

Las suandontas indicaziuns ein necessarias:

• num dil menaschi
• persuna responsabla
• denominaziun dallas localitads
• menaschis secundars (p.ex.: bar, dancing, kiosk, bar da neiv, ustria da curtgin, etc.)
• cuoz dalla lubientscha (valeivla naven da)
• empustaziun digl extract dil register penal

Lubientscha da menar in’ustria occasiunala

Per astgar vender en in’ustria da fiasta bubrondas destilladas, drova ei ina lubientscha da menar in’ustria occasiunala. La damonda ei da tarmetter via formular all’administraziun communala e pretenda negins documents supplementars.

Ulteriuras informaziuns dat il Uffeci per la segirtad da victualias e per la sanadad d’animals

Disoccupaziun

Persunas che enqueran lavur san s’annunziar directamein tier il Center regiunal per intermediaziun da lavur (RAV) cun il formular online, per telefon sut la numera 081 257 62 14 ni per e-mail ad info.ravilanz@kiga.gr.ch.