Uffeci communal dall’AVS
Igl uffeci communal dall'AVS da Mustér ei il post da coordinaziun denter las persunas assicuradas e la cassa da cumpensaziun cantunala e porscha survetschs dall'Assicuranza per vegls e survivents (AVS) e dall'Assicuranza d'invaliditad (AI). Cheutier s'audan cussegliaziuns, annunzias per rentas, annunzias per la cassa da cumpensaziun per famiglias e per prestaziuns supplementaras, informaziuns concernend l'obligaziun da s'assicurar generala e reducziuns dallas premias.
Informaziuns impurtontas
Assicuranza per vegls e survivents (AVS)
L’AVS ei la petga la pli impurtonta dil provediment da vegliadetgna e dil provediment per survivents en Svizra (1. petga). Ella duei cuvierer il basegns d’existenza ella vegliadetgna ni en cass da mortori. Sco assicuranza populara ei l’AVS obligatorica per tuttas e tuts.
Assicuranza d’invaliditad (AI)
Persunas ch’ein impedidas sin fundament da mendas da naschientscha, da malsogna ni d’accident san retrer ina renta dall’AI. Igl intent principal da quella ei da (re)integrar las persunas ella veta professiunala ni en in camp d’incumbensas egual all’activitad da gudogn.
Prestaziuns supplementaras
Las prestaziuns supplementaras gidan, nua che las rentas e las entradas cuvieran buc ils cuosts da viver minimals. Ellas ein in dretg giuridic e negin agid d’assistenza ni agid social. Ensemen cun l’AVS e l’AI s’audan las prestaziuns supplementaras tier il fundament social dalla Svizra.
Uorden da cumpensaziun dil gudogn
A persunas che prestan survetsch militar, protecziun civila ni survetsch civil paga igl uorden da cumpensaziun dil gudogn ina part dalla perdita da gudogn.
Assicuranza encunter la disoccupaziun
L’Assicuranza encunter la disoccupaziun cuviera las rescas dalla disoccupaziun. Plinavon gida ella a cumbatter la disoccupaziun cun prender mesiras sin il marcau da lavur (cuors, occupaziuns temporaras, practicums, contribuziuns alla scolaziun e contribuziuns per l’introducziun ella lavur).
Reducziun individuala dallas premias
Persunas e famiglias da relaziuns mudestas san dumandar sut certas circumstanzias contribuziuns allas premias dall’assicuranza da basa obligatorica per la tgira da malsauns.
L’annunzia ei d’emplenir a moda cumpleta, da suttascriver e d’inoltrar cun las aschuntas necessarias agl uffeci communal dall’AVS. Il formular san ins emplenir ed inoltrar directamein online sin la pagina digl Institut d’assicuranza sociala dil cantun Grischun (SVA).
