Indrez fotovoltaic per la scoletta e per la halla Cons
Igl uost 2022 ha la suprastonza communala decidiu dad instradar il project da montar indrez fotovoltaic sin il baghetg dalla serenera Raveras e da sclarir las pusseivladads da montar indrez fotovoltaics sin ils tetgs dils baghetgs sin igl areal dalla scola. Quels sclariments han mussau, ch’igl ei buca prudent da prender en egl ils tetgs dils baghetgs dalla scola nova e veglia avon ch’igl ei buca clar co ina sanaziun da quels savess veser ora. Auter eis ei tier ils baghetgs dalla scoletta e dalla halla Cons. Quels baghetgs ein en in bien stan ed ils tetgs ein adattai per la montascha dad indrez fotovoltaics.
Sinaquei ei vegniu instradau egl onn 2024 ina procedura da submissiun per l’installaziun da fotovoltaica sin ils baghetgs dalla scoletta e dalla halla Cons. Il project preveda da cuvierer omisduas alas tetg dil baghetg dalla scoletta sco era quellas dalla halla Cons. Totalmein ei previu da realisar ina surfatscha fotovoltaica da 107 m2 sin tetg dalla scoletta ed ina surfatscha da 407 m2 sin il tetg dalla halla Cons.
Oz munta il consum annual d’energia electrica pil menaschi da scola – casa da scola, scoletta e halla Cons – en media a 80’000 kWh.
Entginas datas tecnicas tier il project prevediu:
- Prestaziun da total 125.56 kWp
- Producziun annuala 100’213 kWh
- Consum agen 80%
- Gudogn ord vendita 20%
La forza electrica dils dus implonts novs vegn menada en la centrala d’electricitad dalla scola. Quei munta, ch’ei drova ina colligiaziun denter la halla Cons e la casa da scola nova. Per saver realisar quella colligiaziun basegna ei mudestas lavurs da baghegiar. Dalla vart dalla scoletta ein quellas preparativas gia vegnidas fatgas en connex cun autras lavurs da provediment.
Cuosts
Cuost per l’installaziun fotovoltaica per omisdus baghetgs frs. 222’088.40
Lavurs en connex cun las colligiaziuns denter ils baghetgs frs. 25’000.00
Contribuziuns cantun e confederaziun frs. -42’441.50
Cuosts nets frs. 204’646.90
L’investiziun sa tenor la calculaziun dils planisaders vegnir amortisada enteifer 10 onns. Il credit ell’alteza da frs 205’000.- ei vegnius approbaus dil cussegl da vischnaunca a caschun da sia seduta dils 14 da fevrer 2025.
Il temps per la midada sil sectur dalla producziun energia electrica ei arrivaus – e cun el novas schanzas pil futur. Cun l’installaziun d’indrez solars sin ils tetgs dalla Halla Cons e dalla Scoletta savein nus buca mo profitar dalla forza dil sulegl, mobein era sez contribuir alla producziun ecologica e persistenta d’atgna energia electrica e cheutras alla reducziun dallas emissiuns da CO₂.
Ils implonts solars garanteschan ina rendita a liunga vesta. Ils cuosts d’investiziun vegnan amortisai a mesa vesta grazia alla producziun d’atgna energia e la pusseivladad da vender electricitad supplementara. Il sistem fotovoltaic ei stabils e durabels. A liunga vesta survarga il nez dall’installaziun fotovoltaica ils cuosts inizials.
