Pli sempel, pli efficient cul model da departaments
Cun la seduta dil cussegl da vischnaunca dils 14 da fevrer 2025 ha quel approbau unanimamein l’introducziun dil niev uorden da fatschenta e l’aboliziun dil reglament per la direcziun communala cun l’entschatta mars 2025.
Tgei mida naven digl emprem da mars 2025?
Il model da direcziun ch’ei vegnius applicaus ils davos onns sebasava sin la delegaziun da certas fatschentas dalla suprastonza communala ad in gremi operativ, pia la direcziun communala. La pusseivladad da delegar cumpetenzas e responsabladads ei stipulada ella constituziun communala (art 43). La direcziun communala semetteva ensemen ord il president communal, il meinafatschenta, il menader digl uffeci infrastructura e baghegiar ed il menader dil menaschi tecnic. Quei model ha gia simplificau la lavur dalla suprastonza communala, ha denton era procurau per dapli lavur administrativa. Las midadas e differenzas significantas ein:
- delegaziun sempla e directa da cumpetenzas
- mintga menader da partiziun dispona da cumpetenzas finanzialas
- consultaziun dil cau da departament adina pusseivla
- tractament da fatschentas a moda effectiva ed efficienta
- marcantamein dameins birocrazia
Las cumpetenzas da decider enteifer las spartas ei denton limitada sin il preventiv approbaus dil cussegl da vischnaunca. Per fatschentas che survargan il preventiv vegn tenor altezia dalla summa il departament, la suprastonza communala, il cussegl da vischnaunca ni la cuminonza da votantas e votants consultada. Daniev posseda era il departament «ambient e segirtad» in’atgna sparta cun in’organisaziun operativa. La sparta «Serenera e rumians» era entochen dacheu stada integrada egl uffeci infrastructura e baghegiar.
In’ulteriura midada fundamentala pertucca la cumissiun da baghegiar. Cun il model da direcziun haveva quella ina funcziun da cussegliar. L’instanza da decisiun era la suprastonza communala che haveva delegau quei alla direcziun communala. Daniev decida directamein la cumissiun da baghegiar sur dils fatgs da baghegiar. Els san denton adina sutametter ina fatschenta al gremi surordinau, pia alla suprastonza communala. Era quei fatg reducescha administraziun buca necessaria.
Il niev model da departaments duei possibilitar ina tractaziun sempla ed agila dallas numerusas fatschentas da mintgadi e reducir la birocrazia tier la vischnaunca da Mustér evidentamein. Tut las fatschentas che pretendan dapli attenziun, ni ein d’impurtonza strategica, stattan vinavon ella cumpetenza dalla suprastonza communala.
Entras la repartiziun da cumpetenzas e responsabladads ei la vischnaunca da Mustér ina patruna da lavur moderna ed attractiva. Il model innovativ e cun l’applicaziun en quella fuorma ei singulars en nies cantun e possibilitescha alla vischnaunca dad esser preparada sin la proxima generaziun e sin las sfidas futuras.
