Ils collaboraturs el sectur planisaziun e construcziun cusseglian en tut ils fatgs dil dretg da construcziun, s'occupeschan dallas damondas da baghegiar e survigileschan l'observaziun da prescripziuns dalla polizia da construcziun. Plinavon ein els responsabels per la planisaziun dil territori, da projects dall'infrastructura turistica e dils fatgs da submissiun.
Per projects da construcziun sin il territori communal da Mustér drova ei ina planisaziun cunscienziusa e la lubientscha corrispundenta. La vischnaunca fa ina differenza denter annunzias da construcziun per projects sempels e damondas da baghegiar per projects pli voluminus. Per novas construcziuns ni sanaziuns cumplexas basegna ei ultra da quei ina lubientscha dalla polizia da fiug ni eventualmein d’ulteriurs uffecis cantunals.
Mo cun ina lubientscha da baghegiar en scret dall’autoritad da construcziun communala astgan ins construir, modificar ni spazzar baghetgs e stabiliments (projects da construcziun) ni midar lur intent. Las suandontas damondas ston vegnir inoltradas alla vischnaunca.
Per projects da construcziun sempels san ins inoltrar in’annunzia enstagl d’ina damonda da baghegiar. L’annunzia da baghegiar vegn tractada ella procedura semplificada. L’Ordinaziun davart la planisaziun dil territori per il cantun Grischun (art. 40, 40a, 40b OPTGR) determinescha per tgei projects ch’ei tonscha d’inoltrar in’annunzia da baghegiar.
Suenter che nus havein survegniu l’annunzia da baghegiar examinescha igl uffeci d’infrastructura e construcziun ella. En in proxim pass survegnan ils patruns u la confirma dall’annunzia da baghegiar ni, sch’ei fa da basegns, il resun d’inoltrar ina damonda da baghegiar. Cun la construcziun astgan ins entscheiver pér suenter haver retschiert la confirma digl uffeci d’infrastructura e construcziun.
Inoltrar in’annunzia da baghegiar:
Per tut ils projects da construcziun enteifer la zona da baghegiar che san buca vegnir tractai a maun d’ina annunzia da baghegiar (mira survart), ston ins inoltrar ina damonda da baghegiar.
Sin la plattaforma eBau san ins far annunzias e damondas da baghegiar sin via electronica. Plinavon san ins era inoltrar damondas da baghegiar cun ils formulars dalla vischnaunca
Per projects da construcziun ordeifer las zonas da baghegiar ston vegnir inoltrai, ultra dalla damonda da baghegiar, ulteriurs documents tenor las prescripziuns dils uffecis cantunals. Ulteriuras informaziuns survegnan ins digl Uffeci per il svilup dil territori dil cantun Grischun.
Cheu anfleis Vus ulteriuras informaziuns e formulars.
Per construir novs baghetgs ed engrondir resp. sanar cumpletamein edifecis existents, drova ei ina lubientscha dalla polizia da fiug (GVG). Ulteriuras informaziuns anflan ins tier l’Assicuranza d’edifecis dil Grischun.
La damonda alla polizia da fiug ei d’inoltrar ensemen cun la damonda da baghegiar agl uffeci d’infrastructura e construcziun dalla vischnaunca da Mustér.
Avon che inoltrar la damonda da baghegiar san ins dumandar l’autoritad da construcziun communala per ina valetaziun provisoria dils puncts essenzials dil project da construcziun. Ina valetaziun provisoria remplazza buc ina damonda resp. annunzia da baghegiar.
Quella survesta ei buca cumpleta, ulteriuras pretensiuns e prescripziuns dalla vischnaunca e dils uffecis cantunals restan resalvadas.
Per damondas stattan las collaboraturas ed ils collaboraturs digl uffeci d’infrastructura e construcziun bugen a disposiziun.
Plattaforma per far annunzias e damondas da baghegiar sin via electronica
Annunzia da baghegiar via formular da PDF
Damonda da baghegiar via formular da PDF
Damonda da colligiaziun Spina da Vin
Damonda da spazzar baghetgs e stabiliments
Damonda per ina lubientscha da cavar si vias e sendas
Intent da habitar
Manteniment da vias e sendas
Formular d’annunzia ed autodeclaraziun per indrezs solars
Santeri Sogn Gions – damonda da sligiar ina fossa
