Casa communala – sanaziun ed adattaziun interna dallas localitads
La casa communala alla Via Cons 2 ei vegnida sanada la davosa gada igl onn 2010/2011. Quella sanaziun ha cunteniu surtut optimaziuns en connex cun la termica. Quei vul dir, che la pli gronda part dallas lavurs ch’ein vegnidas exequidas da quei temps han giu liug vid las fatschadas cun integrar la midada dallas finiastras. La structura interna dil baghetg ei da gliez temps buca vegnida midada.
Il svilup en connex cun l’accessibladad per persunas cun impediments, sco era las restructuraziuns dall’organisaziun communala e la segirtad dils visitaders han muentau ils responsabels da prender enta pugn ina sanaziun cun entginas adattaziuns da nossa Casa communala.
Il project preveda ina sanaziun interna dalla casa communala. L’intervenziun duei succeder sin tuttas alzadas dil baghetg priu ora l’alzada sut tiara. Aschia duei il spurtegl che sesanfla actualmein sin l’emprema alzada vegnir transferius el plaunterren. Quei garantescha era a persunas cun impediments corporals, resp. a persunas attempadas igl access tier l’administraziun communala resp. al spurtegl. La suletta alternativa per garantir igl access a persunas cun impediments cun schar il spurtegl sin l’emprema alzada fuss l’integraziun dad in ascensur. Quei vegn actualmein ord motivs da plaz e da cuosts buca en damonda.
Per levgiar e simplificar la collaboraziun denter las collaboraturas ed ils collaboraturs dallas differentas spartas dall’administraziun communala survegn mintga sparta siu agen spazi da lavur. La gronda part dalla structura dil baghetg existent vegn mantenida. Singulas preits vegnan spazzadas, entgins eschs existents serrai si ed auters construi da niev. Cun quellas intervenziuns moderadas san las localitads ch’ein avon maun vegnir adattadas als basegns actuals dil menaschi dall’administraziun.
El plaunterren dalla casa communala dat ei las pli grondas midadas. Il spurtegl ed il local dad exposiziun vegnan plazzai aschia, ch’els ein accessibels per tuttas persunas. Era la tualetta el plaunterren vegn fatga accessibla per persunas en suppia da rodas.
Cuosts:
Il preventiv da baghegiar preveda cuosts da frs. 300’000.–. Per quei project sa la vischnaunca buca quintar cun contribuziuns davart ulteriuras interessenzas respectivamein dil cantun. Consequentamein sto la vischnaunca purtar ils cuosts per quell’investiziun. Il cussegl da vischnaunca ha approbau quei credit a sia seduta dils 11 da november 2024.
Tenor planisaziun duessen las localitads e l’infrastructura nova dalla casa communala saver vegnir pridas en funcziun sil pli tard igl atun 2025. L’execuziun dallas lavurs da construcziun duei succeder naven dalla primavera 2025.
