Portret
Cordial beinvegni a Disentis/Mustér, il vitg claustral dalla Surselva.
Historia
Mustér, il vitg claustral en Surselva, ei enconuschents historicamein sco center dalla Cadi e subcenter dalla regiun. Il num Disentis deriva tgunsch dil latin «dissentire» per «spartida», quei che savess far allusiun allas duas vias da pass digl Alpsu e dil Lucmagn. La claustra benedictina dat dapi varga 1400 onns tempra all’identitad dalla vischnaunca ed influenzescha grondamein la regiun. La vischnaunca ei sesviluppada el decuors dils tschentaners d’in liug rural ad ina destinaziun turistica impurtonta. Ella ha manteniu il lungatg e la cultura romontscha. Malgrad ils svilups moderns ein ils differents uclauns cun lur atgnas historias e tradiziuns restai ina part integrala dalla veta dil vitg. Oz ei Mustér, la pli gronda vischnaunca romontscha, in center cultural, nua ch’il passau ed il present s’uneschan a moda fascinonta.
GeoGR
GeoGR, la plattaforma centrala da geodatas dil cantun Grischun, dat access a geodatas publicas, e quei a moda sempla e gratuita. Cun agid dil viewer survegnan ins informaziuns en connex cun ils objects ed ins sa stampar cartas.
Cefras e fatgs
Cun ver 2’200 habitontas e habitonts s’extenda la vischnaunca da Mustér sur ina surfatscha da 91 kilometers quadrats. Il lungatg ufficial ei il romontsch sursilvan. Tier la vischnaunca da Mustér s’audan numerus uclauns. Naven dil spitg maiestus dil Péz Russein/Tödi cun 3’614 m s.m. tochen al punct il pli bass a Madernal sin 969 m s.m. porscha la vischnaunca ina varietad da cuntradas impressiunonta.
| Cantun | Grischun |
| District | Surselva |
| Populaziun | 2’164 (31.12.2023) |
| Lungatg ufficial | romontsch sursilvan |
| surfatscha | 91 km2 |
| Surfatscha cun habitadis | 1.5 km2 (1.6%) |
| Surfatscha agricola | 18.5 km2 (20.4%) |
| Surfatscha nunfritgeivla | 48.4 km2 (53.2%) |
| Surfatscha cuvretga cun uaul | 22.6 km2 (24.8%) |
| Punct il pli bass | 969 m (Madernal) |
| Punct il pli ault | 3’614 m (Péz Russein, Tödi) |
| Uclauns/fracziuns | Mumpé Tujetsch, Segnas, Peisel, Buretsch, Cuoz, Acletta, Mumpé Medel, Funs, Clavaniev, Latis, Gonda, S. Gions, Dulezi, Raveras, Vitg, Cons, Sontget, Faltscharidas, Chischliun, Disla, Pardomat, Madernal, Cavardiras e Caprau |
| Vischins | Ost: Vischnaunca Sumvitg Vest: Vischnaunca Tujetsch Nord: Cantun Glaruna Sid: Vischnaunca Medel (Lucmagn) |
| Executiva | suprastonza communala (5 commembras e commembers) |
| Legislativa | cussegl da vischnaunca (15 commembras e commembers) |
| Pei da taglia | 99% dalla taglia cantunala |
Nums locals
Ils nums locals dessigneschan loghens ch’ein buca signalisai ufficialmein, mo ch’ein tuttina d’impurtonza historica ni culturala. La carta dat ina survesta da quels loghens specials e muossa nua ch’els secattan exactamein en nossa vischnaunca.
