Puntreis ha festivau il dieschavel

Martin Gabriel/FMR

Ils sunatibas da Tujetsch, la gruppa da corns da catscha Badus, e saltunzas e saltunzs da MOVIS han gratulau al Center da sanadad Puntreis cun producziuns che han procurau per ina biala atmosfera da fiasta. Las var 150 persunas presentas han gudiu igl aperitiv ed il gentar dil gril ch’ei vegnius purschius dall’instituziun giubilara. Dils meinis che la FMR ha registrau tier il publicum da fiasta resorta ch’ins ei oz fetg cuntents d’haver fatg la fusiun dallas treis casas d’attempai da Medel/Lucmagn, Tujetsch e Mustér avon diesch onns.

Tgirar bein il product

«Nus astgein ussa, suenter in decenni, concluder che la decisiun dallas treis vischnauncas Medel/Lucmagn, Tujetsch e Mustér ei stada la solia dretga decisiun», di Christoph Berger, il president dalla fundaziun Puntreis en siu beinvegni silla plazza avon la residenza Puntreis. Cul Center da sanadad Puntreis mondi ei bein oz. Quei secapeschi buca da sesez en temps che tuttas instituziuns da sanadad reclomien pervia dalla munconza da forzas da lavur qualificadas. Christoph Berger di denton era en siu plaid ch’ins stoppi tgirar bein quei ch’ins hagi contonschiu. « Nus astgein buca unfrir Puntreis per motivs politics en favur d’ina reit da sanadad ni da fusiuns che caschunan products nunsurveseivels.» Il president dalla fundaziun ha aschuntau ch’il dretg recept per haver success seigi quel da collaborar sco quei las treis vischnauncas da Medel/Lucmagn, Tujetsch e Mustér fetschien dapi diesch onns. IlCenter da sanadad Puntreis ina dallas instituziuns sursilvanas che ha decidiu da buca prender part dalla Reit da sanadad Surselva.

Relaziuns stabilas

Gian Reto Nufer ei dapi treis onns gestiunari dil Center da sanadad Puntreis. «Jeu sai deplorablamein buca schar passar revista diesch onns», di el. «Mo jeu sai dir ch’jeu hai avon treis onns saviu surprender in menaschi en in excellent stan da miu antecessur Diego Deplazes che ha giu l’incumbensa da realisar la fusiun dallas treis casas d’attempai da Tujetsch, Medel/Lucmagn e Mustér a sias uras.» Il meinacasa da Puntreis ha detg ch’il dialog denter las instituziuns ella regiun seigi fetg buns, malgrad che Puntreis hagi decidiu da buca separticipar dalla Reit da sanadad Surselva. «Nus havein il cletg d’haver relaziuns stabilas pertuccont il persunal qualificau. Perquei che nus havein avunda persunal qualificau savein nus era occupar tuttas combras da nossa casa.»

Fundaziun buc aschi sempla

«Igl ei buca stau aschi sempel a sias uras da realisar in center da sanadad a Mustér», di Christoph Berger, il president dil Center da sanadad Puntreis en discuors cun la FMR. «Mustér, Tujetsch e Medel/Lucmagn havevan treis instituziuns d’attempai cun treis differentas culturas. Tuttas treis vischnauncas eran loschas da saver plazzar lur habitonts en lur atgna casa da vegls.» La fusiun avon diesch onns seigi stada ina visiun, mo era il resultat da discussiuns intensivas, di Christoph Berger. «Oz ein las treis vischnauncas participadas cun mintgamai 180 000 francs. Cun quellas summas bassas per in project da var 27 milliuns francs ein ins vegnius d’impedir igl obstachel dallas votaziuns dil pievel ellas vischnauncas. Il credit da baghegiar ha Puntreis survegniu dallas bancas e naturalmein ina cumpart dil cantun.

Da buna fei

Il meinacasa Gian Reto Nufer ei perschuadius ch’ina squadra da persunal che funcziunescha bein seigi la basa pil success d’ina instituziun d’attempai sco il center da sanadad Puntreis. «En biaras regiuns dalla Svizra, gie dall’entira Europa, aud’ins dalla munconza da persunal qualificau. Tier nus ei il cuntrari il cass. Quei dat speronza a mi e perquei sun jeu engrazieivels sco gestiunari da Puntreis.»