Pendenta ei puspei en discussiun

Hans Huonder/FMR

Ell’ediziun da La Quotidiana da mardis, ils 10 da settember 2024 ei Ignazi Furger s’exprimius en ina brev da lecturs davart igl agir dalla vischnaunca da Mustér en connex cul manteniment e possess dalla punt pendenta. La punt che meina da S. Gada entochen Mumpé Medel ei il mument en construcziun. Ignazi Furger sereferescha silla decisiun all’urna dils 18 da zercladur 2023. 55 % dallas votantas e dils votants han refusau lu il credit da 390 000 francs dalla vischnaunca da Mustér en favur dalla punt pendenta. Ignazi Furger scriva denter auter: «Sco il president communal René Epp ha detg dacuort, duess la vischnaunca ussa tuttina surprender ils cuosts dil manteniment. Quei ei ferm tubac. Il pievel di na ad ina participaziun als cuosts, oravontut als cuosts da manteniment, ed il president communal ni la suprastonza communala dian gie.»

Aschia ein las discussiuns davart la participaziun dalla vischnaunca vid il project s’inflammadas danovamein. Per grondas discussiuns haveva gia la damonda da credit da 390 000 francs procurau la primavera 2023. Buc il davos, perquei ch’exponents dall’Uniun punt pendenta havevan giu puntuau ch’ei seigi buca previu da dumandar per daners la vischnaunca.

Cundiziun dil cantun

Ella votaziun all’urna dils 18 da zercladur 2023 ha il pievel giu da decider davart in credit da 390 000 francs per la realisaziun dil project da La Pendenta. El messadi vegn il manteniment e possess bein era tematisaus, mo el stat buc explicitamein en connex cun quei credit. Sin damonda dalla FMR ha René Epp declarau ils motivs, daco che la vischnaunca vegn en possess ed ei responsabla pil manteniment dalla punt suenter che las lavurs ein a fin en rodund dus meins: «Cun scriver dils 28 da november 2023 ha la regenza communicau alla vischnaunca da Mustér ch’ella concedi il credit da 586 000 francs sulettamein culla cundiziun che la vischnaunca daventi possessura dalla punt. Plinavon ch’ella surprendi il menaschi futur da quella.» El scriver che René Epp presenta alla FMR senumna ei: «La vischnaunca da Mustér ha da surprender la punt suenter che quella ei construida a fin e quei cun tuts dretgs e tuttas obligaziuns. Ella ei responsabla pil manteniment.»

Munchentau d’informar

Silla damonda, daco che la suprastonza communala hagi mai communicau ufficialmein quella pretensiun respectivamein il conclus dalla suprastonza communala, di René Epp: «Nus havein priu per enconuschientscha quella cundiziun. Il medem mument havein nus era schau sclarir giuridicamein, schebein quei seigi pusseivel suenter la votaziun dils 18 da zercladur 2023 e conform allas cumpetenzas dalla suprastonza communala. Sin fundament da quels resultats ha la suprastonza communala priu la decisiun da surprender e mantener la punt e communicau quei all’Uniun La Pendenta.» En quei connex menziunescha René Epp era: «Sche la vischnaunca havess buca surpriu la punt pendenta ed il manteniment, fuss la contribuziun maximala dil cantun ell’altezia da 586 000 francs curdada.» Cun far surprender la vischnaunca la punt ed il manteniment da quella hagi il cantun vuliu segirtad pigl avegnir. Il cantun ha fatg ulteriuras cundiziuns, denter auter che la punt seigi igl avegnir part dalla reit da sendas e che la signalisaziun corrispundenta vegni installada.

Avertura il november

Las lavurs vid la punt pendenta che meina da S. Gada entochen sut Mumpé Medel sur il Rein Anteriur ein ella fasa finala. Suenter ch’ils fundaments persuenter ein vegni construi questa primavera e stad, ein las sugas purtadras vegnidas stendidas las davosas jamnas. Ils davos dus meins avon l’avertura ufficiala vegnan las lavurs finalas fatgas. L’avertura ei previda sonda, ils 16 da november 2024.