Campiunadi grischun cun concurrenza naziunala

Hans Huonder/FMR

La gimnastica d’acrobatica ei buca fetg populara en Svizra. Tonaton dat ei entginas uniuns che porschan quell’activitad dil temps liber. Dapi entgins onns dispona era l’Uniun da gimnastica Cadi d’ina gruppa da quei sport. Ella ei gia separticipada ad entginas concurrenzas en Svizra e quei cun bien success. La gruppa d’acrobatica dall’uniun dumbra il mument 16 mattatschas e mattatschs.

Per l’emprema ga in campiunadi

Ussa fa l’Uniun da gimnastica Cadi in ulteriur pass en favur dalla gimnastica d’acrobatica. La fin d’jamna dils 2 e 3 da november 2024 organisescha ella numnadamein il campiunadi grischun. «Igl ei l’emprema ga che quei campiunadi grischun d’acrobatica sco sport da concurrenza vegn organisaus. Il motiv ei ch’ei deva entochen ussa negin’uniun, respectivamein negina gruppa da gimnastica d’acrobatica el Grischun. Quella dalla Cadi ei l’emprema», di Sara Gadola-Cajacob ch’ei commembra dil comite d’organisaziun. Igl impuls decisiv persuenter seigi vegnius d’Acro Suisse, l’associaziun svizra dalla gimnastica d’acrobatica. Igl arranschament a Mustér vul ella nezegiar per far quei sport pli enconuschents el cantun Grischun.

Ina da pliras concurrenzas

Arranschaus vegn il campiunadi ella halla plurivalenta dil Center Fontauna a Mustér. Per las aspectaturas ed ils aspectaturs vegn construida ina tribuna. Las participontas ed ils participonts semesiran sin ina matta cun ina grondezia da 14 x 14 meters. Quella sto vegnir retratga si dalla Bassa. L’entrada alla concurrenza ei libra.

«Nus selegrein da mintgina e mintgin che vegn sin viseta. Il campiunadi empermetta presentaziuns da concurrenza sin ault nivel, cun elegranza e precisiun», di Sara Gadola-Cajacob. Il campiunadi grischun vala sco qualificaziun pils campiunadis d’Europa. El ei ina da pliras concurrenzas che vegnan organisadas mintg’onn en Svizra.

Gruppas dall’entira Svizra

Sper la gruppa indigena separticipeschan era gruppas da Turitg, Winterthur, Genevra, Gossau e Bülach al campiunadi. 108 participontas e participonts ein s’annunziai. La gronda part ei affons e giuvenils che concurrenzeschan sco duos ni trios. Las prestaziuns vegnan giudicadas d’ina giuria. Da veser el Center Fontauna a Mustér ein acrobatas ed acrobats che s’audan denter las meglieras ed ils megliers dil mund. Aschia Viktor Berezovskiy e Matvii Kosariev che han gudignau bronz il settember 2024 al campiunadi mundial a Portugal ella categoria da duos dils umens.

Ni lu era Timea Spielmann e Norina Fröhlich ch’ei vegnidas otgavlas al campiunadi mundial ella categoria da duos da dunnas. Al campiunadi grischun separticipeschan differentas acrobatas ed acrobats era a pliras disciplinas.

Rimnar experientschas

Il campiunadi grischun da quest onn vul l’Uniun da gimnastica Cadi nezegiar per rimnar exeprientschas cull’organisaziun. «Da principi eis ei bein pusseivel che nus arranschein ina semeglionta concurrenza era ils proxims onns. En tgei turnus dad onns savein nus denton aunc buca. Nus rimnein ussa experientschas», di Sara Gadola-Cajacob. L’infrastructura el Center Fontauna seigi ideala, quei che levgieschi l’organisaziun. Il campiunadi da gimnastica d’acrobatica ei buca mo in’attracziun per las concurrentas ed ils concurrents, mobein era per las aspectaturas ed ils aspectaturs. Leutier gioga era il factur economic ina rolla, pertgei biaras e biars d’ordeifer restan era sur notg a Mustér.

* RTR emetta il campiunadi via livestream. Ulteriuras informaziuns pon ins cattar sin acrosuisse.ch.